Gífurleg leit að árásarmanninum í Toulouse

Einhver mesta lögregluleit í sögu Frakklands er nú gerð að árásarmanninum sem skaut fjóra til bana, þar af þrjú börn fyrir utan gyðingaskóla í borginni Toulouse í gærmorgun.

Rannsókn hefur leitt í ljós að árásarmaðurinn notaði sama skotvopn og notað var til að myrða þrjá hermenn af afrískum uppruna í Frakklandi í síðustu viku.

Franska lögreglan telur að um raðmorðingja sé að ræða og leggur allt í sölurnar til að stöðva manninn áður en hann lætur til skarar skríða að nýju.

Vegna árásinnar í gærdag verður mínútuþögn í öllum skólum Frakklands klukkan 11 fyrir hádegið til að minnast þeirra sem fórust í árásinni í gærmorgun.