Tölvuglæpir urðu að pólitísku andófi á síðasta ári

Aðgerðarsinnar stálu mun meira af gögnum frá stórfyrirtækjum á síðasta ári en tölvuþrjótar. Fjarskiptafyrirtækið Verizon hefur birt niðurstöður rannsóknar þar sem rýnt var í fjölda tölvuárása og skaðsemi þeirra.

Samkvæmt niðurstöðum Verizon varð mikil aukning í tölvuglæpum á síðasta ári og voru flestar þeirra skipulagðar og framkvæmdar af pólitískum aðgerðarsinnum.

Verizon greindi frá því í dag að þessir hópar hafi rænt 58% af öllum þeim gögnum sem stolið var úr tölvukerfum og netþjónum fyrirtækjanna á síðasta ári.

Talsmaður Verizon segir að mun erfiðara sé að takast á við árásir þessara hópa enda séu aðferðir þeirra óútreiknanlegar.

„Aðgerðarsinnar hafa lengi vel notast við veraldarvefinn til að koma málstað sínum á framfæri," sagði Wade Bake hjá Verizon. „Á síðasta ári varð þó breyting á því. Núna sækjast þessir hópar eftir að ná í gögn frá fyrirtækjunum"

Talið er að samtökin Anonymous beri ábyrgð á þessari bylgju í tölvuglæpum. Frá samtökunum hafa fleiri hópar myndast líkt og Antisec og Lulzsec.

„Á síðasta ári umbreyttist gagnastuldur yfir í pólitískt andóf," sagði Baker.