Neyddu stúlkur í vændi - strikamerki húðflúrað á úlnliðinn

Rannsókn spænsku lögreglunnar á umfangsmiklum vændisglæpahring leiddi meðal annars til þess að  nítján ára stúlku var bjargað. Stúlkan var með strikamerki húðflúrað á úlnliðinn á sér, en lögreglan segir að höfuðpaurarnir hafi gert það eftir að hún reyndi að flýja fyrir nokkrum mánuðum.

Talið er að húðflúrið hafi átt að vera einhverskonar vottorð um að stúlkan væri í „eigu" vændishringsins. Fyrir neðan strikamerkið var húðflúrað 2000 €, en það á að hafa táknað hversu mikið hún skuldaði eftir að hafa reynt að flýja. Þá var einnig búið að raka af henni augabrúnirnar og hárið í refsingarskyni.

Vændisglæpahringnum var stjórnað af tveimur frændum frá Rúmeníu en starfsemin var gerð út frá Montera götunni í Madrid. Ásamt þeim tveimur voru tuttugu og tveir aðrir handteknir, í Madrid og Getafe. Fjölda stúlkna var bjargað í aðgerðum lögreglunnar.

Mennirnir neyddu stúlkur, oft stúlkur undir lögaldri, í vændi og tóku alla peningana sem þær unnu sér inn. Á heimili þeirra var mikið magn af peningum, gull skartgripir, sverð og bílar. Mennirnir tveir eiga yfir höfði sér ákæru.