Cameron birtir fyrstu myndirnar frá botni Maríana-gilsins

Leikstjórinn og ævintýramaðurinn James Cameron hefur birt fyrstu myndirnar frá botni Maríana-gilsins í Kyrrahafi. Cameron komst niður á botn gilsins fyrr í vikunni eða niður á 11 kílómetra dýpi.

Cameron sagði að botn gilsins hefði verið eins og yfirborðið á tunglinu. „Þetta er afar einmanalegur staður," sagði Cameron. „Gríðarlega einangraður. Þetta var ótrúleg reynsla sem maður verður að upplifa til að skilja fullkomlega"

Það tók Cameron tvo klukkutíma að komast niður á botn Maríana-gilsins. Hann var einn í djúpsjávarkafbátnum Deepsea Challenger en hafði þó nokkrar kvikmyndavélar með í för.

Vitanlega var Cameron með snjallsíma meðferðis og birti hann þessi skilaboð á samskiptasíðunni Twitter þegar hann náði botninum: „Just arrived at the ocean's deepest pt. Hitting bottom never felt so good. Can't wait to share what I'm seeing w/ you @DeepChallenge"

Hægt er að horfa á myndskeiðið hér fyrir ofan en þar má sjá fyrstu myndirnar frá botni Maríana-gilsins.