Um 1.500 flóttamenn létust á sjó í fyrra

Nefnd á vegum Evrópuráðs sem rannsakað hefur dauðsföll 63 flóttamanna við strendur Líbíu á síðasta ári hefur komist að því að björgunaraðgerðir NATO hafi einkennst af mistökum.

Flóttamennirnir voru á leið frá Líbíu þegar bátur þeirra varð aflvana. Atlantshafsbandalagið skipulagði björgunaraðgerðir ásamt strandgæslunni í Líbíu.

Fólkið var á sjó í 15 daga áður en báturinn missti afl. Níu lifðu af.

Í skýrslu nefndarinnar kemur fram að björgunarskip NATO hafi ekki reynt að hafa samband við flóttamennina.

Talið er að um 1.500 flóttamenn hafi látist á sjó á síðasta ári. Flestir voru á leið frá Líbíu eða öðrum stríðshrjáðum löndum í Norður-Afríku.