Hvítlaukssvikari dæmdur í sex ára fangelsi

Írinn Paul Begley, sem var einn umsvifamesti ávaxtasali Írlands, var dæmdur í sex ára fangelsi á dögunum fyrir stórfellt skattasvindl. Hann flutti inn hvítlauk frá Kína yfir fjögurra ára tímabil en merkti vöruna sem epli.

Ástæðan var einfaldlega sú að skattur á innfluttum eplum var margfalt minni en skattur á hvítlauknum sem er rúmlega 200 prósent. Aftur á móti er skattur á eplum aðeins níu prósent. Rannsókn hófst á málinu árið 2007.

Talið er að þessi hvítlaukssvik hafi kostað þjóðarbú Íra, 1,6 milljónir evra, eða ríflega 200 milljónir króna.

Dómarinn, sem dæmdi Paul, tók sérstaklega fram að honum þætti leitt að dæma hann til fangelsisvistar, Paul hefði verið mikilvægur máttarstólpur i írsku viðskiptalífi auk þess sem hann gaf háar fjárhæðir til góðgerðarsamtaka. Engu að síður væru brot hans alvarleg. Því væri ekki hjá dóminum komist. Hvítlaukssvikarinn þarf því að dúsa í fangelsi næstu sex árin.