Klaufalegur fjölmiðlamaður varð eyrnalausri kanínu að aldurtila

Eyrnalaus kanína, sem var rísandi stjarna í Þýskalandi, mætti endalokum sínum undir stígvéli myndatökumanns.

Fjallað var um hörmuleg endalok kanínunnar Til í þýskum fjölmiðlum í dag. Til var aðeins 17 daga gamall. Hann fæddist með afar sjaldgæfan genagalla sem orsakaði eyrnaleysi hans. Áætlað var að halda blaðamannafund í dýragarðinum í Saxlandi í dag en þar átti að kynna Til fyrir heimsbyggðinni.

Myndatökumaðurinn sagði fréttablaðinu Bild að hann hafi ekki vitað að Til hafði falið sig í hálmhrúgunni. Tökumaðurinn steig á hálminn fyrir slysni.

Uwe Dempewolf, stjórnandi dýragarðsins, sagði að Til hefði ekki liðið kvalir. „Þetta var beint högg," sagði Dempewolf.

Samkvæmt Bild er tökumaðurinn afar sorgmæddur vegna atviksins.

Tímaritið Spiegel sagði að Til hafi verið „fórnarlamb fjölmiðla."

Samkvæmt Dempewolf verður hræið af Til fryst og uppstoppað.

Til er ekki fyrsta dýrið sem heillar Þjóðverja en margir muna eftir ísbirninum Knúti og spádóms kolkrabbanum Paul sem sá fyrir úrslit fótboltaleikja á heimsmeistamótinu árið 2010.