George Clooney handtekinn

Stórleikarinn George Clooney var handtekinn ásamt föður sínum fyrir utan sendiráð Súdans í Washington í Bandaríkjunum í dag. Honum, auk fjölmargra annarra mótmælenda, voru gefnar þrjár viðvaranir um að fara ekki inn fyrir lögregluborða fyrir framan sendiráðið. Clooney virti aðvaranirnar að vettugi og var því handtekinn fyrir borgaralega óhlýðni.

Mótmælin snéru að forseta Súdan, Omar al-Bashir, sem hefur verið sakaður um að koma í veg fyrir að mataraðstoð berist í réttar hendur í Suður Súdan.

Stórstjarnan var leidd í burtu í handjárnum ásamt föður sínum, en áður sagði hann í viðtali við AP fréttastofuna að hann vildi vekja athygli umheimsins á stöðunni í Súdan.