Stökk úr 22 kílómetra hæð og stefnir enn hærra

Austurríski fallhlífastökkvarinn Felix Baumgartner stökk úr 22 kílómetra hæð í dag. Stökkið var ætlað sem æfing fyrir næsta stökk hans. Hann vonast til að setja heimsmet í sumar þegar hann stekkur úr tæplega 40 kílómetra hæð.

Núverandi heimsmet er rúmlega 30 kílómetrar og er áratuga gamalt.

Þrátt fyrir að stökkið í dag hafi verið hugsað sem æfing, þá var það enginn hægðarleikur. Baumgartner var lokaður í þrýstijöfnuðu hylki er hann sveif upp í 22 kílómetra hæð. Hann opnaði síðan dyr hylkisins, horfði í kringum sig og stökk.

Baumgartner náði rúmlega 580 kílómetra hraða á klukkustund.

Hann féll í rúmar þrjár mínútur áður en hann losaði fallhlífina. Það tók hann svo heilar 8 mínútur að svífa til jarðar.

Hægt er að sjá kynningarmyndband Red Bull um stökkið hér fyrir ofan.

Með stökkinu vildu Baumgartner og samstarfsmenn hans prufa þann búnað sem hann notast við í sumar.

En Baumgartner mun ekki aðeins setja nýtt heimsmet í sumar. Hann verður einnig fyrsti maðurinn til rjúfa hljóðmúrinn án þess að sitja í flugvél.

Verkefnið er kallað Stratos og er styrkt af Red Bull. Geimferðastofnun Bandaríkjanna, NASA, kemur að skipulagningu þess.