Brasilía styður Argentínu í Falklandaseyjadeilunni

Stjórnvöld í Brasilíu hafa lýst yfir stuðningi sínum við kröfur Argentínumanna um yfirráðin yfir Falklandseyjum.

Í frétt um málið á Reuters segir að fari svo að Brasilíumenn styðji einnig fyrirhugaðar refsiaðgerðir Argentínumanna gegn olíufélögum sem eru að leita að olíu við Falklandseyjar muni það skapa mikinn vanda hjá þessum olíufélögum.

Fram hefur komið að Argentínumenn ætla í alþjóðleg málaferli gegn olíufélögunum. Mun kyrrsetning eigna þeirra í Argentínu verða liður í málaferlunum. Svipuð kyrrsetning í Brasilíu myndi koma verulega við kaunin á olíufélögunum sem flest eru með töluverða starfsemi í Brasilíu.