Fjórir látnir eftir skotárás í Frakklandi

Fjórir eru látnir eftir að maður hóf skotárás á gyðingaskóla í borginni Toulouse í Frakklandi í morgun. Nicolas Sarkozy, forseti Frakklands segir árásina vera þjóðarharmleik.

Þrjú börn létust í árásinni og einn kennari. Þá liggur unglingspiltur þungt haldinn á gjörgæslu.

Vitni segja að maðurinn hafi verið á skellinöðru þegar hann hóf skotárásina og að hann hafi notað hríðskotabyssu. Saksóknari sagði að maðurinn hafi skotið á allt sem á vegi hans varð, hann hljóp jafnvel á eftir börnunum inn í skólann.

Maðurinn komst undan á skellinöðrunni.

Börnum, foreldrum og kennurum er nú boðin áfallahjálp við skólann.