Sex breskir hermenn féllu í Afganistan

Sex breskir hermenn féllu í suðurhluta Afganistans þegar farartæki ók á sprengju og sprakk í loft upp. Þetta er mesta mannfall sem Bretar hafa orðið fyrir í einu atviki frá því að Nimrod flugvél fórst þar árið 2006 með fjórtán manns innanborðs.

Tala fallinna Breta í Afganistan frá árinu 2001 er nú komin í 404. Óljóst er hvers kyns sprengju var að ræða en talið er að annaðhvort hafi henni verið komið fyrir í vegarkanti, eða þá að um gamla jarðsprengju hafi verið að ræða frá því Sovétmenn gerðu innrás í landið á níunda áratugi síðustu aldar.