Ráðgáta hvað olli dauða tvíburasystra í Kaliforníu

Lögreglan í Bandaríkjunum hefur loks haft upp á ættingjum tvíbura sem létust með stuttu millibili á heimili sínu á afskekktu svæði í Kaliforníu. Síðustu áratugi höfðu konurnar lítið sem ekkert samband við umheiminn.

Systurnar Patricia og Joan Miller bjuggu við Lake Tahoe í Kaliforníu í tæp 40 ár. Þær töluðu aldrei við nágranna sína. Þær voru 73 ára gamlar þegar þær létust skyndilega á heimili sínu. Heilbrigðisstarfsmaður kom að konunum. Patrice fannst í svefnherberginu á meðan Joan fannst á ganginum. Ekki er vitað hvað dró konurnar til dauða.

Ómögulegt reyndist að hafa upp á ættingjum systranna og voru nöfn þeirra því opinberuð. Stuttu seinna höfðu systkinbörn þeirra samband við lögregluyfirvöld. Ættingjar systranna höfðu ekki heyrt frá þeim í áraraðir.

En þó svo að ættingjarnir hafi varpað ljósi á aðstæður systranna þá er dauði þeirra enn ráðgáta.

Réttarmeinafræðingar segja að konurnar hafi verið látnar í nokkrar vikur áður en þær fundust. Engin ummerki voru um átök á heimilinu. Enn fremur var heimilið snyrtilegt og því er ekki talið að konurnar hafi þjáðst af geðröskunum. Að auki höfðu konurnar verið við góða heilsu.

„Það lítur út fyrir að önnur hafi dáið á undan hinni," sagði rannsóknarlögreglumaðurinn Matt Harwood. „Að öllum líkindum hefur hin ekki þolað sorgina og látist stuttu seinna."

Patricia og Joan giftust aldrei. Þær áttu hvorki börn né gæludýr og virtust aðeins kunna að meta félagsskap hverrar annarrar.

Einmana dauði þeirra er mikil andstæða við töfraljóma æsku þeirra. Á sínum yngri árum voru systurnar söngkonur. Þær komu reglulega fram í þættinum „The Hoffman Hayride" á sjötta áratugnum. Þær skemmtu einnig á herstöðum víða um Bandaríkin.

Systurnar skráðu hvor aðra sem nánasta ættingja, samkvæmt lögreglunni í Kaliforníu.