Bild hættir að birta nektarmyndir

Þýska æsifréttablaðið Bild hefur ákveðið að snúa baki við áralangri hefð sinni að birta ljósmyndir af nöktum konum á forsíðunni. Hefðin er rótgróin og hefur verið við lýði í 28 ár.

Bild hefur birt rúmlega 5.000 nektarmyndir frá árinu 1984.

Ákvörðunin var tekin á ritstjórnarfundi blaðsins í gær - á alþjóðlegum baráttudegi kvenna - og birtist síðasta myndin í dag. Stúlkan sem sat fyrir á ljósmyndinni heitir Eva og er af pólsku bergi brotin. „Ég er sú síðasta," sagði Eva.

„Þetta er lítið skref fyrir konur," segir í blaðinu. „En þetta er stórt skref fyrir Bild og karlmenn almennt."

Einnig var ákveðið að birta umdeilda fyrirsögn frá árinu 1970: „Konur vita minna en karlar."

„Við skömmumst okkar fyrir þessa fyrirsögn," segja ritstjórar Bild.