Japanir í viðbragðsstöðu vegna eldflaugaskots Norður-Kóreu

Eldflaugavarnarkerfi japanska hersins hefur verið sett í efsta viðbúnaðarstig. Er þetta gert vegna væntanlegs eldflaugaskots Norður-Kóreumanna.

Stjórnvöld í Norður-Kóreu tilkynntu um eldflaugaskotið í síðasta mánuði. Yfirlýstur tilgangur þess er að koma gervitungli á sporbraut um jörðu. Yfirvöld í Japan er þó á öðru máli og telja að skotið sé liður í kjarnorkuáætlun Norður-Kóreu.

Talið er að Norður-Kóreumenn séu að þróa langdrægar eldflaugar sem geta borið kjarnaodda.

Eldflaugin er af gerðinni Unha-3. Yfirvöld í Norður-Kóreu stefna á að skjóta eldflauginni á loft milli 12. og 16. apríl.

Stjórnvöld í Japan, Suður-Kóreu og Bandaríkjunum hafa gagnrýnt yfirvöld í Norður-Kóreu harðlega vegna skotsins og segja að það brjóti í bága við ályktanir Sameinuðu Þjóðanna.

Þetta er ekki í fyrsta sinn sem Japanir undirbúa eldflaugavarnir sína vegna tilraunaskots Norður-Kóreu. Í ágúst árið 1998 og í apríl tæpum áratug seinna skutu Norður-Kóreumenn eldflaugum þvert yfir norðurhluta Japan.

Í þetta sinn mun langdræg eldflaug Norður-Kóreumanna fara yfir austurhluta landsins. Þannig mun flaugin fljúga yfir Okinawa-eyjar.

Varnarmálaráðherra hefur fyrirskipað hermönnum sínum að skjóta niður eldflaug Norður-Kóreumanna.