Fjársjóður upp á yfir 60 milljarða kominn heim til Spánar

Spænsk herflugvél með 17 tonn af gulli og silfri innanborðs lenti á flugvelli við Madrid um helgina og lauk þar með fimm ára löngu dómsmáli um eignarhaldið á þessum fjársjóð.

Það voru bandarískir fjársjóðsleitendur sem fundu fjársjóðinn árið 2007 í flaki 200 ára gamals spænsks herskips undan strönd Gíbaltrar. Um var að ræða freigátuna Nuestra Senora de las Mercedes en hún var á leið til Spánar frá Perú árið 1804 með 17 tonn af gull- og silfurpeningum þegar breski flotinn sökkti henni í orrustunni við Santa Maria höfðann.

Bandaríkjamenn fluttu fjársjóðinn, sem þá var metinn á hálfan milljarð dollara eða yfir 60 milljarða króna til Bandaríkjanna. Um leið hófust deilur um eignarhaldið á þessum peningum. Spænsk stjórnvöld töldu að fjársjóðurinn væri hluti af spænskum menningararfi. Að lokum fór svo að Spánverjum var dæmdur eignarétturinn fyrir dómstól í Flórída.

Að sögn spænskra fjölmiðla mun þessi fjársjóður verða geymdur á leynilegum stað á Spáni.