Smástirni ferðast óþægilega nálægt Jörðinni árið 2040

Vísindamenn hjá NASA hafa uppgötvað smástirni sem mögulega gæti skollið á Jörðinni 5. febrúar árið 2040. Smástirnið er 140 metrar að breidd og er kallað 2011 AG5.

Samkvæmt útreikningum NASA eru líkurnar á að smástirnið lendi á Jörðinni 1 á móti 625. Með tímanum geta líkurnar þó breyst.

Rannsóknarteymi á vegum Sameinuðu Þjóðanna hefur nú þegar hafið vinnu við að rannsaka möguleg úrræði við árekstri.

Smástirnið er margfalt minna en það sem grandaði risaeðlunum fyrir 65 milljón árum en það var rúmlega 14 kílómetrar að breidd. Staðsetning skiptir sköpum ef smástirnið lendir á Jörðinni. Í versta falli lendir smástirnið á þurru landi og gæti valdið milljónum dauðsfalla.

Árið 2023 mun smástirnið svífa framhjá Jörðinni og óttast vísindamennirnir að það muni ferðast í gegnum hið svokallað skráargat.

Fari smástirnið í gegnum skráargatið mun sporbraut þess breytast vegna þyngdarafls Jarðarinnar. Þannig verður smástirnið mun nær Jörðinni þegar það nálgast á ný árið 2040.