Romney sigraði í Michigan og Arizona

Mitt Romney náði að sigra í prófkjöri Repúblikanaflokksins í Michigan í nótt. Þegar nær öll atkvæði voru talin var Romney með 41% atkvæða á móti 38% hjá Rick Santorum helsta keppinaut hans.

Sigurinn í Michigan er talinn mjög mikilvægur fyrir Romney en hann átti lengi undir högg að sækja þar. Michigan telst heimaríki Romney en þar er hann fæddur og faðir hans var þar lengi vinsæll ríkisstjóri.

Þá vann Romney stórsigur í prófkjörinu í Arizona. Þar fékk hann 47% atkvæða á móti 26% hjá Santorum. Við þessum úrslitum var búist þar sem stór hluti kjósenda í Arizona eru mormónar eins og Romney.