Tólf ára piltur bjargaði heimili ömmu sinnar

Með því að biðla til ókunnugra um að gefa pening tókst 12 ára gömlum pilti að koma í veg fyrir að amma hans myndi lenda á götunni.

Noah Lamaide frá Wisconsin í Bandaríkjunum bað fólk um að gefa peninga í gegnum góðgerðarstofnun sem hann stofnaði fyrir tveimur árum. Verkefnið er kallað „Noah's Dream Catcher Network." Noah lagði af stað með verkefnið til að hjálpa bágstöddum íbúum New Orleans hefur að fellibylurinn Katrina gekk yfir borgina.

Amma Noah hefur rekið fósturheimili svo árum skiptir. Hún hefur fóstrað rúmlega 100 börn. Eftir að hún veiktist fyrir nokkrum mánuðum þurfti hún að velja á milli lyfjanna og lánanna.

Þegar viðskiptabanki hennar tilkynnti henni um að hún hefði misst heimilið tók Noah til sinna ráða. Það tók hann nokkrar vikur að safna nægilegum pening svo að amma hans gæti haldið húsinu.

„Ég hafði ekki hugmynd um hversu mikið það er af góðu fólki í heiminum," sagði Noah í viðtali á sjónvarpsstöðinni ABC9.

Amman var vitanlega afar ánægð með barnabarnið. „Ég talaði við þingfulltrúa okkar, ríkisstjórann og forsetann. Ég bað ekki um peninga heldur úrræði. Ekkert gekk. Síðan kemur þessi 12 ára piltur og bjargar húsinu mínu."