Kvikmyndargerðarmenn létust í þyrluslysi í Ástralíu

Tveir kvikmyndargerðarmenn létust í þyrluslysi í austurhluta Ástralíu í nótt. Mennirnir voru sérfræðingar í neðansjávarmyndatöku og unnu að heimildarmynd fyrir National Geographic.

Talið er að þyrlan hafi hrapað til jarðar stuttu eftir flugtak. Í tilkynningu frá National Geographic og leikstjóranum James Cameron kemur fram að samfélag djúpsjávar rannsakenda hafi misst tvo af sínum bestu mönnum.

Mennirnir sem fórust hétu Mike deGruy og Andrew Wight.

Sá fyrrnefndi hefur unnið að gerð heimildarmynda árum saman og hefur hlotið Emmy- og BAFTA-verðlaun fyrir kvikmyndatöku. Wight framleiddi kvikmyndina „Sanctum" árið 2010 og er myndin arðbærasta kvikmynd Ástralíu.

„Mike og Andrew voru eins og bræður mínir," sagði Cameron. „Við vorum úthafs-bræður. Þeir voru sannir könnuðir og saman fóru þeir á staði sem manneskjan hafði aldrei séð áður."