Fidel Castro kynnir ævisögu sína

Fidel Castro, fyrrverandi forseti Kúbu, undirbýr nú útgáfu ævisögu sinnar.

Hinn 85 ára gamli byltingarleiðtogi kynnti bókina í dag en Castro hefur ekki komið opinberalega fram síðan í apríl á síðasta ári.

Ævisagan er ekkert smáræði en hún er tæpar 1.000 blaðsíður að lengd og verður gefin út í tveimur bindum. Í bókinni ræðir Castro um æsku sína og kúbversku byltinguna.

Á kynningarfundinum sagði Castro að það væri skylda hvers Kúbverja að berjast fyrir mannkyninu, plánetunni og Kúbu.