Loksins sigur hjá Chelsea | Barton skoraði og fékk rautt

Chelsea vann í dag sinn fyrsta sigur í fimm leikjum í ensku úrvalsdeildinni. Chelsea sótti þá Wolves heim og vann afar nauman sigur.

Heiðar Helguson var eini Íslendingurinn sem lék í úrvalsdeildinni í dag. Eggert Gunnþór Jónsson var ekki í leikmannahópi Wolves og Gylfi Þór Sigurðsson er ekki kominn til Swansea.

Heiðar var í byrjunarliði QPR gegn Norwich. Þar var hinn nýbakaði faðir Joey Barton í aðalhlutverki. Hann skoraði fyrsta mark leiksins en fékk svo rautt spjald skömmu síðar fyrir að skalla leikmann Norwich.

Sjónvarpsupptökur af atvikinu voru ekki mjög góðar en Barton var afar ósáttur við brottvísunina. Hann sagðist vera alsaklaus.

Heiðar var nýfarinn af velli þegar Norwich skoraði sigurmark leiksins.

Chelsea lenti í basli gegn Wolves og mátti þakka fyrir að missa ekki mann af velli í fyrri hálfleik. Lampard fékk gult spjald fyrir skrautlega tæklingu og Ashley Cole hefði hæglega getað fokið af velli með tvö gul en slapp með skrekkinn.

Þess utan voru Úlfarnir að skapa sér betri færi. Það var því nokkuð gegn gangi leiksins er Ramires kom Chelsea yfir með huggulega skoti í teignum.

Fögnuður Chelsea-manna var táknrænn en nokkrir leikmenn liðsins söfnuðust saman og hlupu að stjóranum, Andre Villas-Boas. Miklar sögusagnir eru um ósætti í herbúðum Chelsea en leikmenn reyndu að slá á þær sögusagnir með þessum gjörningi. Ekki tóku þó allir leikmenn þátt í þessum fögnuði.

Þegar rúmar fimm mínútur voru eftir af leiknum nældu Úlfarnir í verðskuldað jöfnunarmark. Steven Ward skoraði þá með föstu skoti í teignum.

Leikmenn Chelsea lögðu ekki árar í bát og Frank Lampard skoraði sigurmark leiksins einni mínútu fyrir leikslok. Sendi frá Cole í teiginn og Lampard framlengdi í netið.

Úrslit dagsins:

Aston Villa-Swansea 0-2

0-1 Nathan Dyer (5.), 0-2 Wayne Routledge (47.)

Blackburn-Stoke 1-2

0-1 Peter Crouch (16.), 0-2 Peter Crouch (45.), 1-2 David Goodwillie (71.)

QPR-Norwich 1-2

1-0 Joey Barton (11.), 1-1 Anthony Pilkington (41.), 1-2 Steve Morison (83.)

Rautt spjald: Joey Barton, QPR (36.)

Wolves-Chelsea 1-2

0-1 Ramires (54.), 1-1 Stephen Ward (85.), 1-2 Frank Lampard (89.)