Raskar lífi fimmtíu milljóna

Hundruðum þúsunda íbúa í New York, Atlantic City og fleiri stöðum á norðausturströnd Bandaríkjanna var skipað að yfirgefa heimili sín í gær meðan fellibylurinn Sandy hamaðist á þessu svæði.

Öðrum var gert að halda sig inni við yfir nóttina, enda algert útgöngubann í gildi. Lestarsamgöngur lágu niðri, leigubílstjórar lögðu niður störf, skólum var lokað og mörg fyrirtæki og stofnanir sögðu starfsfólki sínu að mæta ekki til vinnu.

Fárviðrinu fylgdi mikið úrhelli og flóð, enda sjávarstaða með hæsta móti og öldurnar allt að 3,5 metra háar. Þá fór rafmagn af stóru svæði svo hundruð þúsunda manna voru án rafmagns.

Alls er talið að fellibylurinn raski lífi um 50 milljón manns þessa daga sem hann gengur yfir.

Þetta er einn stærsti fellibylur sem komið hefur á þessum stað í Bandaríkjunum. Hann kom að landi seint í gærkvöld og verður öflugur áfram næstu daga meðan hann mjakast inn á land og síðan til norðausturs yfir til Kanada.

Í síðustu viku hafði þessi sami fellibylur gert mikinn usla í Karíbahafinu, þar sem hann kostaði að minnsta kosti 69 manns lífið.