Tvær bílsprengjur kostuðu 10 manns lífið í Damaskus

Að minnsta kosti 10 manns fórust þegar tvær öflugar bílsprengjur sprungu í miðborg Damaskus í morgun, á fjórða degi svokallaðs vopnahlés í Sýrlandi.

Vopnahlé þetta sem komið var á fyrir helgina hélt ekki nema fyrstu klukkutímana og síðan hafa stríðandi fylkingar í landinu sakað hvor aðra um að hafa rofið það.

Vopnahléið var gert vegna hinna árlegu pílagrímaferða múslima til Mekka sem nú standa yfir. Hátt í 200 manns hafa fallið í Sýrlandi frá því að vopnahléið tók gildi.

Lakhdar Brahimi sérlegur sendifulltrúi Sameinuðu þjóðanna hefur lýst yfir miklum vonbrigðum sínum með að vopnahléið hélt ekki.