Bertrand fékk nýjan samning hjá Chelsea

Ryan Bertrand hefur skrifað undir nýjan fimm ára samning við Evrópumeistara Chelsea en hann er 23 ára gamall.

Bertrand var óvænt í byrjunarliði Chelsea gegn Bayern München í úrslitaleik Meistaradeildar Evrópu og er greinilega ætlað stórt hlutverk hjá Chelsea í framtíðinni.

Hann getur bæði spilað sem vinstri bakvörður og á kantinum en hann var í síðasta mánuði valin í enska landsliðið í fyrsta sinn. Hann er nú í landsliðshópi Englands fyrir leikinn gegn Moldóvu.

Bertrand gæti fengið fleiri tækifæri í liði Chelsea á næstunni þar sem að Ashley Cole á nú við meiðsli að stríða.

Hann gerði fjögurra ára samning við Chelsea í fyrra en nýi samningurinn er sagður færa honum umtalsverða launahækkun.