KFS nýbúið að gera sex ára samning við Iceland Express

Öllum starfsmönnum flugþjónustunnar, Keflavík Flight Services, á Keflavíkurflugvelli var sagt upp störfum í gær eftir að flugfélagið Astraeus hætti rekstri. Framkvæmdastjóri fyrirtækisins segir þetta vera mikið áfall enda var félagið nýbúið að gera sex ára þjónustu samning við Iceland Express.

Keflavík Flight Service sá um að afgreiða vélar Astreus sem sinnti flugþjónustu fyrir Iceland Express. Astraes fór í slitameðferð í gær og hefur Iceland Express gert nýjan Þjónustusamning við tékkneska flugfélagið CSA Holidays. Það félag er hins vegar með samning við IGS á Keflavíkurflugvelli sem er dótturfélag Icelandair.

Hilmar Hilmarsson, framkvæmdastjóri Keflavik Flight Service, segir að félagið fyrst fengið vitneskju um málið í gær.

En þetta bar svolítið brátt að?

„Já mjög svo. Það vissi enginn af þessu. Mjög leiðinlegt.“

Keflavik Flight service undirritaði þjónustusamning við Iceland Express í vor og gildir samningurinn í sex ár. Félagið var búið að fara út í töluverðar fjárfestingar til þess að sinna afgreiðslu á Keflavíkurflugvelli og Hilmar bendir á að samningurinn sé enn í gildi.

„Ég veit ekki hvort þetta sé skammtímamál með csa og mér skilst að iceland express sæki um flugrekstrarleyfi og það getur vel verið að við tökum við afgreiðslu hjá um leið og þeir eru komnir með leyfi aftur. og þetta sé bara í nokkra mánuði sem csa er. en ég er ekki búinn að fá neinar skýringar frá þeim ennþá.“

Annað félag, GMT eða Ground Maintainance techincs, sá um viðgerðar og tækniþjónustu fyrir vélar Astreus á Keflavíkurflugvelli. Magnúss Gunnarsson, framkvæmdastjóri félagsins, sagði í samtali við fréttastofu í morgun ekki búast við því að rekstrarstöðvun Astreus muni hafa veruleg áhrif á rekstur fyrirtækisins að svo stöddu. Þeir hafi nú þegar sett sig í samband við tékkneska félagið upp mögulega þjónustusamning.