Átta skólar þurftu að vísa nemum frá

339 unglingar sem kláruðu tíunda bekk í vor fengu ekki skólavist í þeim framhaldsskóla sem þeir helst vildu. Átta skólar þurftu að vísa þessum nemendum frá og hafa þeir fengið skólavist í öðrum skólum. Þetta kemur fram í tölum sem Fréttablaðið fékk frá mennta- og menningarmálaráðuneytinu.

Innritun nýnema er lokið og hefur öllum 4.209 unglingunum sem luku tíunda bekk í vor og sóttu um framhaldsskóla verið komið fyrir í skólum. Nemendum býðst sem fyrr að sækja um aðalskóla og annan til vara.

Verzlunarskóli Íslands er áfram vinsælasti skóli landsins, en 466 nemar völdu skólann sem sitt fyrsta val í framhaldsskóla. Verzlunarskólinn hefur pláss fyrir 336 nýnema og þurftu því 130 nemendur frá að hverfa.

Menntaskólinn við Hamrahlíð er næstvinsælastur, en þangað vildu 327 nemar. Pláss er fyrir 225 nýnema og skólinn þurfti því að vísa 102 frá. Alls sóttu 247 nemar um bæði í Menntaskólanum í Reykjavík og Kvennaskólanum í Reykjavík. MR tekur inn 250 og gátu því þrír nemendur sem völdu skólann sem annað val komist inn, en Kvennaskólinn tekur 210 og þurfti að vísa 37 frá.

Fjölbrautaskóli Suðurlands, Flensborgarskólinn, Menntaskólinn við Sund, Fjölbrautaskólinn í Garðabæ og Framhaldsskólinn á Laugum þurftu einnig að vísa nemendum frá sem höfðu haft skólann sem fyrsta val. Þeir þurftu að hafna á bilinu fjórum til 22 nemendum. Aðrir skólar gátu tekið við einhverjum fjölda nemenda sem ekki komust inn í þann skóla sem þeir helst vildu.

Alls sóttu 4.209 unglingar sem útskrifuðust úr grunnskólum landsins í vor um nám í framhaldsskólum. Það eru rúmlega 96 prósent allra sem útskrifuðust. Hlutfallið er svipað og í fyrra.

Um 98 prósent komust inn í annan þeirra skóla sem sótt var um, þar af 87 prósent í þann skóla sem var fyrsta val. Skólarnir þurftu að taka frá fjörutíu prósent plássa sinna fyrir nemendur úr skólum í nágrenni þeirra og veita þeim forgang.

thorunn@frettabladid.is