Forseti Brasilíu fyrst kvenna

Forsetaskipti fara fram í Brasilíu í dag þegar Dilma Rousseff tekur við sem forseti af Lula da Silva. Rousseff, sem orðin er 62 ára gömul, hefur lofað að heiðra það traust sem brasilíska þjóðin hefur sýnt henni. Forgangsverkefni hennar verður að eyða fátækt í landinu. Rousseff sat í fangelsi á 8. áratug síðustu aldar þegar hún barðist gegn herforingjastjórninni sem sat allt til ársins 1985.

Da Silva studdi Rousseff með ráðum og dáð í kosningabaráttunni sem fór fram í haust en það þykir hafa ráðið úrslitum hve góður gangur hefur verið í efnahagslífi landsins undir hans stjórn.