Benfica staðfestir tilboð frá Chelsea

Benfica hefur staðfest að félagið eigi nú í viðræðum við Chelsea um varnarmanninn David Luiz.

Luiz hefur undanfarnar vikur verið sterkleag orðaður við Chelsea en fyrir stuttu var greint frá því að Benfica hefði hafnað tilboði frá Chelsea.

En félagið hefur nú staðfest að viðræður séu enn í gangi. Enskir fjölmiðlar telja að Chelsea hafi boðið um 21 milljón punda en ágreiningur sé um hvernig Chelsea muni greiða fyrir kappann.

Luiz er samningsbundinn Benfica til loka tímabilsins 2015 en hann er 23 ára gamall Brasilíumaður. Hann kom til Portúgals árið 2007 og lék sinn fyrsta landsleik í ágúst í fyrra.

Carlo Ancelotti, stjóri Chelsea, hefur viðurkennt að hann hafi augastað á Luiz.