Eiður: Ég get farið frítt frá Stoke

Eiður Smári Guðjohnsen segist vera reiðubúinn til að taka á sig launalækkun til að komast til Ajax í Hollandi.

Eiður hefur verið sterklega orðaður við félagið en félagaskiptin eru sögð háð því að Luis Suarez verði seldur frá Ajax. Sá hefur helst verið orðaður við Liverpool.

Eiður gekk til liðs við Stoke í lok sumars en hefur lítið fengið að spila þar og ekkert síðan í lok október. Tony Pulis, stjóri Stoke, hefur aldrei gefið honum tækifæri á sæti í byrjunarliðinu.

Hann er í enskum fjölmiðlum í dag sagður á háaum launum, um 80 þúsund pund í vikulaun. Aðrir fjölmiðlar hafa áður greint frá því að Eiður sé með vikulaun á bilinu 70-75 þúsund pund.

Eins og greint var frá í gær stóð honum til boða að fara til félaga í Ameríku og Dúbæ en að hann vilji fara til Amsterdam.

Málið snýst ekki um peninga. „Ég get nú þegar farið frítt frá Stoke því að samningurinn minn rennur út í lok tímabilsins," er haft eftir Eiði Smára.

„Ég hef líka trú á því að ef Ajax nær samkomulagi um mig muni Stoke greiða hluta af mínum launum. Ég er reiðubúinn til að sætta mig við mun minna."