Hrina nauðgana í Noregi - Stoltenberg leitar ráða hjá Dönum

Alda nauðgana hefur gengið yfir Ósló, höfuðborg Noregs, í ár þar sem árásum á konur á götum úti að nóttu til hefur fjölgað sérstaklega mikið.

Síðasta tilfellið var aðfaranótt sunnudags þegar tveir menn réðust á 18 ára stúlku á leið úr samkvæmi. Alls er skráð 51 nauðgun af þessu tagi í borginni það sem af er ári, en allt árið í fyrra voru 24 slíkar árásir tilkynntar.

Í Noregi er greinarmunur gerður á aðstæðum þar sem nauðganir eiga sér stað. Alls eru á milli 8.000 og 16.000 nauðganir tilkynntar á landsvísu ár hvert, en þar undir eru í fyrsta lagi stefnumótanauðganir, þá nauðgun þar sem gerandi er nákominn þolanda og loks árásarnauðganir þar sem ókunnur maður eða menn ráðast á konu á almannafæri, oftast í skjóli nætur.

Í þessum síðastnefnda flokki hefur tilvikum fjölgað ískyggilega síðustu ár, en á árunum 2006 til 2008 var samtals tilkynnt um 41 árásarnauðgun.

Lögreglan í Ósló hefur verið gagnrýnd harðlega fyrir getuleysi sitt í að stemma stigu við nauðgunum og hve illa gengur að upplýsa málin. Af þessum árásarnauðgunum, sem fyrr greinir, hafa aðeins sjö af 51 verið upplýstar og því hefur rannsóknarlögregla ríkisins verið kölluð til aðstoðar.

Um 300 manns komu saman í miðborg Óslóar um helgina og fordæmdu árásirnar og um leið var þess krafist að lögreglan tæki á nauðgunarmálum af meiri festu.

Ríkisútvarpið (NRK) hefur eftir Herdisi Mageröy, sem starfar í athvarfi fyrir fórnarlömb nauðgana, að lögregla leggi ekki nógu mikið í rannsóknir á málunum. „Það hefur orðið til þess að margar konur veigra sér við að kæra nauðganir vegna þess að þær óttast að ekki sé tekið af alvöru á málunum," sagði hún.

Jens Stoltenberg forsætisráðherra hefur tekið málið upp og leitað ráða hjá borgaryfirvöldum í Kaupmannahöfn, sem hafa náð nokkrum árangri í þessum efnum. „Núverandi ástand í Ósló er óviðunandi," sagði Stoltenberg við NRK. „Þá er mikilvægt að allir leggist á eitt og líti einnig til þess sem má læra af öðrum."

Meðal þeirra aðgerða í Kaupmannahöfn sem Stoltenberg vísar til er meiri sýnileiki lögreglu á götum borgarinnar, efling almenningssamgangna að næturlagi og bætt lýsing á dimmum og afskekktum stöðum.

thorgils@frettabladid.is