Welbeck þakklátur Sunderland

Danny Welbeck, leikmaður Manchester United og enska landsliðsins, er þakklátur þeim tíma sem hann varði hjá Sunderland á síðustu leiktíð.

Þar var hann á láni frá United á síðustu leiktíð og skoraði hann sex mörk og bætti sig mikið sem knattspyrnumaður.

Hann kom svo aftur til United í sumar og hefur staðið sig vel í upphafi leiktíðar. Hann hefur alls skorað fimm mörk í átta leikjum sínum með liðinu.

Welbeck var verðlaunaður með sæti í A-landsliði Englands fyrir leik liðsins gegn Svartfjallalandi á föstudaginn kemur.

„Það skipti mig miklu máli að fá að spila reglulega í ensku úrvalsdeildinni. Ég naut þess tíma sem ég var í Sunderland. Það var meira að segja ný reynsla fyrir mig að flytja að heiman og búa einn."

„Það hjálpaði mér að þroskast og vaxa en ég varð meira að segja að elda mér minn eigin mat af og til. Maturinn var kannski ekkert frábær en þetta skánaði hjá mér. Ég held að ég hafi vaxið til manns á þessum tíma."