Ferguson telur að Rooney geti náð Bobby Charlton

Sir Alex Ferguson, knattspyrnustjóri Manchester United, telur góðar líkur á því að Wayne Rooney muni á endanum bæta markamet Bobby Charlton hjá félaginu.

Charlton lék með United í sautján ár og skoraði á þeim tíma 247 mörk. Rooney er sem stendur í níunda sæti markalistans með 156 mörk en á aðeins sjö árum. Rooney á nóg eftir og ekki ólíklegt að hann geri atlögu að metinu með þessu áframhaldi.

„Hann er aðeins 25 ára gamall sem þýðir að hann á að minnsta kosti fimm mjög góð ár eftir. Ef hann hugsar svo jafn vel um sig og Ryan Giggs getur hann spilað langt fram á fertugsaldurinn,“ sagði Alex Ferguson, stjóri United, við enska fjölmiðla.

„Þetta er vissulega möguleiki og tíminn vinnur með honum. Hann er þegar byrjaður að skora mikið á þessu tímabili og vona ég að hann skori meira en 30 mörk áður en því lýkur í vor.“