Ferguson vill halda Scholes

Alex Ferguson, stjóri Manchester United, segist vilja halda Paul Scholes hjá félaginu í eitt ár til viðbótar.

Scholes hefur sjálfur ekki tjáð sig um framtíðina og segist fyrst og fremst einbeittur að því að standa sig vel. Hann er 36 ára gamall og á langan feril að baki með United.

Ryan Giggs, félagi hans hjá United, samþykkti nýverið eins árs framlengingu á sínum samningi en hann er 37 ára gamall.

Þá greindi hinn fertugi Edwin van der Sar frá því í vikunni að hann myndi leggja hanskana á hilluna í lok tímabilsins.

„Paul hefur ekki ákveðið sig," sagði Ferguson. „Ég vona að hann spili í eitt ár til viðbótar. Ég tel að hann geti það en læt hann um ákvörðunina."