Pedro og Buddy aðskildir

Forboðnar ástir finnast ekki einungis hjá mannfólkinu. Gæslumenn í dýragarðinum í Toronto uppgötvuðu fyrir nokkru að tvær karlkyns mörgæsir, þeir Pedro og Buddy, hefðu fellt hugi saman og ruglað reitum.

Hátterni Pedro og Buddy vakti athygli gæslumanna þegar ljóst var að að mörgæsirnar eyddu öllum stundum saman. Félagarnir sýna öll merki um eðlilegt tilhugalíf afrískra mörgæsa. Þeir ólust báðir upp í dýragarðinum og frá kynþroska hafa þeir verið nær óaðskiljanlegir.

En eins og tíðkast í ástarsögum þá er dramatíkin aldrei langt undan - nú stendur til að aðskilja Pedro og Buddy.

Afrískar mörgæsir eru í útrýmingarhættu og nauðsynlega vantar fleiri ungviði í stofninn. Því ætla gæslumenn í dýragarðinum að aðskilja Pedro og Buddy í þeirri von um að þeir eignist unga með kvenkyns mörgæsum.

En ástarsögurnar enda þó oftast vel og munu Pedro og Buddy sameinast á ný eftir að þeir hafa makað sig.