Eigandi Rottweilertíkarinnar verður ákærður

„Við vitum ekki hvar tíkin er, hún er ófundin," segir Þorgrímur Óli Sigurðsson, aðstoðaryfirlögregluþjónn á Selfossi. Eigandi Rottweilertíkarinnar Chrystel, sem var stolið úr vörslu lögreglunnar í byrjun maí, á yfir höfði sér ákæru fyrir að vera ekki með tíkina skráða.

Samkvæmt upplýsingum frá lögreglu ber hundaeigendum að skrá hunda sína hjá sveitarfélagi sínu og borga leyfisgjald, en svo var ekki í tilviki Chrystelar. Eigandinn verður því ákærður fyrir að hafa ekki gert það.

Samkvæmt úrskurði héraðsdýralæknis og síðar úrskurðarnefnd um hollustuhætti og mengunarvarnir ber að aflífa Chrystel eftir að hún beit konu í handlegginn í byrjun marsmánuður. Áður en það var gert, var tíkinni stolið úr vörslu lögreglunnar og hefur ekki komið í leitirnar.

Lögreglan heldur áfram að leita að tíkinni og vonast eftir að fá vísbendingar um hvar tíkin er niðurkomin.

Forsaga málsins:

Tæpir þrír mánuðir eru síðan Chrystel beit konu sem var á leið í heimsókn til eigenda tíkarinnar, og á lóðinni fyrir utan hús þeirra þar sem tíkin var bundin. Sýslumaðurinn á Selfossi úrskurðaði, með vísan álit héraðsdýralæknis, að tíkinni skyldi lógað. Eigandi tíkarinnar var ósáttir við þann úrskurð og réði sér lögmann. Chrystel var þá vistuð, á vegum lögreglunnar, á hundahóteli. Þaðan var henni síðan stolið í byrjun mánaðarins. Lögreglan fór þá fram á húsleitarheimild hjá eiganda tíkarinnar, sem þá var fluttur til Akureyrar.

Dómari hafnaði þessu og taldi ekki liggja fyrir neinar vísbendingar um að eigandi hafi átt aðild að hundaráninu. „Í málinu liggja hinsvegar ekki frami gögn sem staðfesta fullyrðingar lögreglu um að þar hafi (eigandi tíkarinnar) verið að verki og er því að mati dómsins ekki fullnægjandi rannsóknarforsendur sem tengja (eiganda tíkarinnar) við töku hundsins af hundahótelinu," sagði í úrskurði dómara.

Fyrir dómi bar lögmaður eigandans engu að síður að tíkin væri komin á heimili eigandans á Akureyri og dveldist þar. Eigandinn var í framhaldinu boðaður til yfirheyrslu hjá lögreglunni á Akureyri. Hann lýsti því yfir að það væri ekki rétt með farið hjá lögmanninum að tíkin væri á heimilinu og veitti sjálfur leyfi fyrir húsleit.

Þar var tíkin ekki og hefur ekkert komið fram síðan sem hefur vísað lögreglu á sporið.