BBC: Liverpool kaupir Luis Suarez á 23 milljónir punda

BBC var að greina frá því rétt áðan að Liverpool sé búið að kaupa Luis Suarez á 23 milljónir punda frá hollenska félaginu Ajax.

Luis Suarez er 24 ára framherji sem sló í gegn með landsliði Úrúgvæ á HM í Suður-Afríku síðasta sumar. Hann á eftir að fara í læknisskoðun og semja um launamál við Liverpool.

Liverpool bauð í fyrstu 12,7 milljónir punda í leikmanninn en þurfti að lokum að nær tvöfalda tilboð sitt til þess að krækja í þennan snjalla sóknarmann.

Suarez skoraði 81 mark í 108 leikjum með Ajax og hann hefur skorað 10 mörk í 30 landsleikjum fyrir Úrúgvæ þar af þrjú þeirra á HM síðasta sumar.