Hermann orðaður við Rangers

Hermann Hreiðarsson er í enskum fjölmiðlum í dag orðaður við skoska úrvalsdeildarfélagið Rangers.

Þetta er ekki í fyrsta sinn sem Hermann er sagður hafa vakið áhuga skoska risans. Walter Smith, stjóri Rangers, vildi kaupa hann sumarið 2009 en þá gat hann það ekki vegna fjárhagsvandræða félagsins.

Hermann er 36 ára gamall og nýbúinn að jafna sig á meiðslum í nára. Hann hefur verið í byrjunarliði Portsmouth í síðustu þremur leikjum liðsins en það er nú í átjánda sæti ensku B-deildarinnar.

Smith mun nú hafa áhuga á að bæta við sig varnarmanni og hefur víst efni á að fá Hermann nú þar sem að félagið er nýbúið að missa Kenny Miller til Bursaspor á Tyrklandi.

Rangers er sem stendur í öðru sæti skosku úrvalsdeildarinnar, fimm stigum á eftir Celtic en á þó tvo leiki til góða.