Gróf upp lík og klæddi í kjóla

Lögregluyfirvöld í Rússlandi hafa handtekið mann eftir að jarðneskar leifar 27 ungra kvenna fundust í íbúð hans. Maðurinn er grunaður um að hafa grafið lík kvennanna upp víðs vegar um Rússland, en flestar í borginni Nizhny Novgorod þar sem hann býr.

Sá handtekni heitir Anatoly Moskvina, 45 ára gamall sagnfræðingur, og er lýst sem bráðgáfuðum furðufugli. Hann hefur um árabil unnið að því að skrifa bók um rússneska kirkjugarða sem hugsuð er sem leiðarvísir fyrir áhugamenn um kirkjugarða og greftrunarsiði þar í landi, að því er BBC greinir frá. Mun maðurinn hafa rannsakað 750 kirkjugarða á nokkurra ára tímabili.

Sveit innan lögreglunnar hefur rannsakað málið eftir að tilkynningar um horfin lík tóku að berast í tugavís. Grafarræninginn er sagður hafa haft 27 lík af ungum konum í íbúð sinni sem hann klæddi í kjóla eða klæddi upp sem leikfangabangsa. Upp um hann komst þegar foreldrar hans komu í óvænta heimsókn. Nágrannar Moskvina segja hegðun hans hafa verið undarlega; svaf hann oft á garðbekkjum kirkjugarða eða í líkkistu heima hjá sér, að því er vefmiðillinn Mail Online greinir frá. -shá