Skoða peningastreymi til flokka

Danir eiga nú að fá að vita meira um hvaðan féð til stjórnmálaflokkanna kemur. Ríkisstjórn Helle Thorning-Schmidt ætlar að skipa nefnd sérfræðinga sem eiga að skoða vel og vandlega reglurnar um fjárstuðning við stjórnmálaflokka.

Dönsku reglurnar verða bornar saman við reglur sem gilda í þeim löndum sem Danir eru vanir að bera sig saman við.

Sérfræðingarnir eiga að koma með bein tilmæli um hvernig tryggja megi gegnsæið.

Jyllands-Posten greindi í fyrra frá því hvernig stjórnmálaflokkarnir afla fjár, hversu auðvelt er að sniðganga gildandi reglur og hversu algengt er að það sé gert.

Á vef Jyllands-Posten er greint frá því að flokkarnir stofni svokölluð styrktarfélög til þess að sniðganga regluna um að gefa upp nöfn þeirra sem veita hærri styrki en 20 þúsund danskar krónur. Ekki er gerð krafa um að gefið sé upp hverjir styrkja flokkana um upphæðir undir 20 þúsund krónum.

Með stofnun félaganna er hægt að fela nöfn upphaflegu gefendanna. Einnig er greint frá því að margir stjórnmálamenn taki við stórum styrkjum í kosningasjóði í kjördæmunum sem almenningur hefur almennt ekki aðgang að.

Evrópuráðið hefur ítrekað hvatt Dani til þess að auka gegnsæið varðandi styrkveitingar til stjórnmálaflokkanna. - ibs