Ba loksins kominn til West Ham

Enska úrvalsdeildarfélagið West Ham hefur loksins staðfest að félagið hafi keypt framherjann Demba Ba frá Hoffenheim í Þýskalandi.

Þetta hefur staðið lengi til en félögin hafa átt í erfiðleikum um að komast að samkomulagi um hvernig félagaskiptunum yrði háttað.

Í fyrstu var talið að Ba færi til West Ham á lánssamningi en nú hefur verið greint frá því að Ba samdi við West Ham til loka tímabilsins 2014.

Kaupverðið mun nema um sex milljónum punda en það er háð frammistöðu hans hjá West Ham.

„Þetta hefur átt sér langan aðdraganda en ég er hamingjusamur í dag því sagan fékk góðan endi."

„Ég mun gefa allt mitt fyrir West Ham. Ég er mjög spenntur fyrir því að spila í ensku úrvalsdeildinni."

Ba fór í verkfall hjá Hoffenheim í upphafi mánaðarins til að fá félagaskipti sín til West Ham í gegn. Um tíma leit út fyrir að hann myndi fara til Stoke en hann féll þar á læknisskoðun.