Óánægður Lamborghini eigandi lét rústa bílnum með sleggjum

Pirraður eigandi Lamborghini ofursportbíls fékk nóg af ítrekuðum bilunum í bílnum og fékk því hóp manna til þess að eyðileggja hann með sleggjum. Atvikið var tekið upp á myndband eins og sjá má ef ýtt er á spilarann hér að ofan.

Eigandinn, sem er kínverskur, hafði farið með bílinn í viðgerð í umboðið. Viðgerðin hafði hinsvegar mistekist auk þess sem viðgerðarmennirnir höfðu beyglað stuðarann. Maðurinn lét ekki bjóða sér þetta en í stað þess að kvarta til neytendasamtaka eins og flestir hefðu sennilega gert ákvað hann að láta rústa bílinn í vitna viðurvist í gær, á alþjóðlegum degi neytenda.

Í Kína kostar Lamborghini af þessari tegund heilar 85 milljónir íslenskra króna. Ekki fylgir sögunni hvernig bíleigandinn hefur komist í álnir en hann á greinilega eitthvað í buddunni.