Ræninginn sem kunni að skammast sín - flýði eftir að börn buðu sparifé

Ræningi vopnaður skammbyssu dinglaði á bjöllu á heimili í þýska bænum Schwanewede nærri Bremen á mánudaginn. Barnapía á heimilinu kom til dyra og ræninginn þröngvaði sér inn og ógnaði stúlkunni með skammbyssu.

Samkvæmt þýska miðlinum The local voru tvö börn, yngri en sjö ára, á efri hæðinni. Þau komu niður með allt spariféð sitt og buðu þjófinum í staðinn fyrir að hann sleppti barnapíunni.

Svo virðist sem ræninginn hafi kunnað að skammast sín því hann yfirgaf heimilið án þess að taka spariféð af börnunum né meiða nokkurn. Lögreglan leitar ræningjans sem var líklega tæplega tvítugur að aldri.