Ferguson: Schmeichel gerði líka mistök í fyrstu leikjunum

Sir Alex Ferguson, stjóri Manchester United, segir að það taki alla evrópska markverði dágóðan tíma að aðlagast enska boltanum. Ferguson tjáði sig um frammistöðu Spánverjans David De Gea sem hefði átt að gera mun betur í markinu sem hann fékk á sig í 2-1 sigri United á West Bromwich Albion í gær.

„David er ungur en hann hefði átt að gera betur í þessu marki. Hann missti þarna aðeins einbeitinguna en hann var síðan heldur betur boðinn velkominn í enska boltann í seinni hálfleik þar sem þeir létu hann finna fyrir sér. Hann átti að fá mun meiri vörn frá dómaranum en fékk hann ekki og þetta var góð reynsla fyrir hann. Hann er ungur og verður fljótur að læra," sagði Sir Alex Ferguson

„Ég trúði því samt varla þegar hann fékk ekki aukaspyrnur dæmdar í þessum leik. Það var fáránlegt hvað þeir fengu að keyra inn í hann," sagði Sir Alex en menn búast ekki við því að hann kalli á Anders Lindegaard alveg strax þrátt fyrir að De Gea hafi verið að gefa ódýr mörk í fyrstu tveimur leikjunum.

„Það er mín reynsla af evrópskum markvörðum að það tekur þá alla tíma að komast inn enska boltann því þetta er annar leikur hér. Það var eins með Peter Schmeichel. Hann spilaði fyrsta leikinn á móti Wimbledon þar sem hann fékk að finna fyrir því og í öðrum leiknum fékk hann líka á sig skelfilegt mark. Peter varð síðan einn besti markvörður allra tíma. Strákurinn er aðeins 20 ára gamll og það eina rétta í stöðunni er að klappa honum á öxlina og bjóða hann velkominn í enska boltann," sagði Ferguson en það hefði örugglega verið annað hljóð í skoska stjóranum ef United hefði tapað þessum tveimur fyrstu leikjum sínum.