Torres opinn fyrir því að fara til Chelsea

Samkvæmt heimildum fréttavefs Sky Sports mun Fernando Torres hafa beðið forráðamenn Liverpool um að íhuga betur tilboð Chelsea.

Í morgun var greint frá því að Chelsea hafi lagt fram tilboð í Torres upp á 35 milljónir punda.

Torres hefur lengi verið orðaður við Chelsea en Liverpool hafnaði umsvifalaust tilboðinu sem lagt var fram og sagði leikmanninn ekki til sölu.

Talið er að Chelsea muni nú leggja fram nýtt tilboð í Torres áður en félagaskiptaglugginn lokar á mánudagskvöld. Spænski blaðamaðurinn Guillem Balague hefur fullyrt að samkvæmt sínum heimildum hafi Torres beðið forráðamenn Liverpool að íhuga tilboð Chelsea.

Balague hefur einnig fullyrt að það sé engin klásúla í samningi Torres sem segir að Liverpool verði að selja hann fyrir ákveðna upphæð. Ákvörðunin er því alfarið í höndum félagsins.