Jovanovic hafnaði Wolfsburg

Milan Jovanovic, leikmaður Liverpool, mun hafa hafnað tilboð frá þýska úrvalsdeildarfélaginu Wolfsburg.

Wolfsburg mun hafa lagt fram tilboð upp á sex milljónir punda en Jovanovic er sagður í enskum fjölmiðlum í dag hafa komið þeim skilaboðum á framfæri að hann vildi ekki fara til Þýskalands.

Kenny Dalglish, stjóri Liverpool, er einnig sagður viljugur að selja einhverja leikmenn til að félagið hafi efni á að kaupa þá Luis Suarez frá Ajax og Charlie Adam frá Blackpool.

Jovanovic hefur aðeins spilað í einum leik - tapleiknum gegn Blackpool - síðan að Dalglish tók við af Roy Hodgson sem knattspyrnustjóri.

Fyrir stuttu var Ryan Babel seldur frá Liverpool til þýska félagsins Hoffenheim.