Skoskir fjölmiðlar segja Guðlaug hafa samið við Hibernian

Skoskir fjölmiðlar greindu frá því í morgun að Guðlaugur Victor Pálsson hafi samþykkt átján mánaða samning við Hibernian sem er háð því að hann standist læknisskoðun.

Guðlaugur Victor hefur verið á mála hjá enska úrvalsdeildarfélaginu Liverpool í tvö ár en hann mun koma án greiðslu frá félaginu til Skotlands.

Guðlaugur spilaði æfingaleik með Hibernian gegn Dunfermline fyrr í vikunni og þótti standa sig vel. Colin Calderwood, stjóri Hibernian, hafi því gefið grænt ljós á félagaskiptin.

Sjálfur sagðist Guðlaugur í viðtali við The Scotsman vera vongóður um að gengið verði frá félagaskiptunum innan skamms.

„Ég tel að þetta gæti verið gott skref fyrir mig eftir að hafa verið í tvö ár hjá Liverpool," sagði hann. „Ég er bjartsýnn á að gengið verði frá þessu innan skamms."

Þá greindi Fótbolti.net frá því í morgun að Gunnar Heiðar Þorvaldsson, sem var nýverið til reynslu hjá Hibernian, fái ekki samning hjá félaginu og sé á leið aftur til Danmerkur. Þar er hann á mála hjá Esbjerg.