Ákærðir fyrir hrottalega nauðgun

Ríkissaksóknari hefur ákært tvo karlmenn fyrir Héraðsdómi Reykjavíkur fyrir hrottalega nauðgun.

Mönnunum er gefið að sök að hafa að morgni sunnudagsins 16. október tekið konu upp í bifreið við Laugaveg í Reykjavík, ekið með hana að Reykjavíkurflugvelli, og þeir þar í félagi, í aftursæti bifreiðarinnar, þröngvað henni með ofbeldi til samræðis.

Mennirnir játuðu við yfirheyrslur hjá lögreglu að hafa tekið konuna upp í bifreiðina og ekið með hana að Reykjavíkurflugvelli þar sem kynferðisleg samskipti hafi átt sér stað. Framburður þeirra um hvað gerðist nákvæmlega er þó ekki samhljóða, en hvorugur kannast við að hafa þvingað konuna til kynferðismaka.

Framburður konunnar hefur aftur á móti verið greinargóður og skýr. Hún segir mennina hafa boðist til að aka sér í verslun sem hún ætlaði í og hafi hún þegið það. Hún hafi reynt að telja mönnunum trú um að hún væri smituð af HIV í þeim tilgangi að fá þá til að hætta ofbeldinu. Þá hafi hún einnig sagst hafa öskrað en þegar hún hafi gert það hafi ökumaðurinn tekið hana hálstaki og lamið hana í andlitið.

- jss