Liverpool á von á nýju tilboði - Torres vill fara

Fernando Torres lagði inn formlega beiðni til forráðamenn Liverpool um að verða settur á sölulista. Beiðninni var umsvifalaust hafnað en þetta var tilkynnt á heimasíðu Liverpool í gærkvöldi.

Fram kemur í enskum fjölmiðlum í dag að Liverpool eigi nú von á nýju tilboði frá Chelsea en félagið hafnaði tilboði upp á 35 milljónir punda í Torres fyrr í gær.

Torres lagði inn beiðnina aðeins fáeinum klukkustundum eftir að Liverpool komst að samkomulagi við Ajax um kaup á framherjanum Luis Suarez. Sá þarf nú að standast læknisskoðun og komast að samkomulagi um kaup og kjör.

Fram kom í tilkynningu Liverpool í gær að félagið myndi vænta þess að Torres myndi virða það samkomulag sem hann gerði við félagið og stuðningsmenn þess á sínum tíma.

Þetta kom sem mikið reiðarslag fyrir forráðamenn Liverpool sem voru búnir að vonast til þess að kaupin á Suarez væru nóg til að sannfæra leikmenn eins og Torres að félaginu væri alvara í því að byggja upp betri leikmannahóp og ná betri árangri í framtíðinni.

Torres er samningsbundinn Liverpool til loka leiktíðarinnar 2013 og er talið að hann sé ekki með klásúlu í samningi hans sem neyðir Liverpool til að leyfa honum að fara frá félaginu fyrir tiltekna upphæð.