Björn Valur: Það er ágreiningur og við munum leysa hann

„Það blasir við ágreiningur, á því er enginn vafi, og við ætlum að leysa hann,“ sagði Björn Valur Gíslason, þingflokksformaður Vinstri grænna, í viðtali í Kastljósinu í kvöld, þar sem hann sat fyrir svörum ásamt Ólöfu Nordal, þingflokksformanni Sjálfstæðisflokksins.

Þegar hann var spurður beint út hvort þingflokkurinn treysti Jóni Bjarnasyni, sjávarútvegsráðherra eða ekki, svaraði hann því til að hreinskilin umræða hefði farið fram á fundi flokksins í dag, en þeirri umræðu væri ekki lokið.

Hávær krafa er uppi um að Jón Bjarnarson hætti sem sjávarútvegsráðherra þegar hann lét vinna kvótafrumvarp án þess að bera það á nokkurn hátt undir ríkisstjórnina.

Björn Valur sagði í Kastljósi að það hefði komið upp vandamál, eða trúnaðarbrestur, og það væri unnið að því að leysa þann brest. Aftur á móti væri óljóst hvenær niðurstaða fengist í málið, en þingflokkur Vinstri grænna, fundar næst á miðvikudaginn.

Ólöf sagðist hafa staðið í þeirri trú að ríkisstjórnin væri veik fyrir þetta mál. „ En það er ljóst að þessir atburðir hafa veikt hana enn frekar,“ bætti Ólöf við.

Hún benti einnig á að búið sé að taka kvótafrumvarpið úr höndum sjávarútvegsráðherra, en nokkurskonar verkstjórn hafi verið skipuð til þess að fara með málið.

Þá sagði hún orku ríkisstjórnarinnar fara meira eða minna í að leysa ágreiningsmál innan ríkisstjórnarinnar á sama tíma og íslenska þjóðin tekst á við afleiðingar efnahagshrunsins.

Björn Valur hafnaði þessu, sagði ríkisstjórnina vinnusama og hún hefði unnið að mörgum málum á kjörtímabilinu. Þá bætti hann við að auðvitað væri ágreiningur innan ríkisstjórnarinnar, enda um tvo ólíka flokka að ræða.